Warum dr Schwob sei Kehrwoch mecht.
S gibt gute Gründ warum dr Schwob sei Kehrwoch oifach macha muß und net drumrum kommt.
Z erscht muß mr no kurz erwähne, Kehrwoch wird immr am Samschdich gmacht. Oft ischs dann so, daß d Fraa im Haus putzt, dr Mo ausarum. Des isch no a ganz klare Uffteilung und s gibt koin Schtreit.
Dr Schwob isch saubr.
Für a schwäbische Hausfrau (odr Hausmo, solls ja au gäba) isch des a riesigs Lob wenn mr zurer secht: "Eier Gehwäg isch abr fei schee saubr." odr: "S Träppahaus isch so saubr, do kenntsch vom Boda ässa" obwohl mr eigntlich net vom Boda ässa sollt.
Wenn dr Mo d Rasa mäht (Dr Mäher isch uff genau 35mm gschtellt), odr sein Daimlr putzt, no duat Fraa halt s Träppahaus wischa und d Gehwäg fähga. Natierlich isch des a Gschäft, des kennt mr doch au übr Näbakoschta von dr Miete an a Putzfirma abdrücka. Macht n rechta Schwob abr net. Weil nemlich andre net gscheit putza könna und sowieso koi Ohnung von nix hänn, no mecht mrs halt glei sälbr.
Dr Schwob isch gsällig.
Ja was glaubat ihr was am Samschdich los isch. Mit Oimr, Lappa und Meischtr Proppr bewaffnet trifft mr sich im Träppahaus. No isch des so: Vom Schtock übr oim putzt oine runtr. Wenn die no endlich do isch wird bahtscht. No putzt mr zu zwoit bis zum nägschta Schtock nundr. Do trifft mr no nomol a Nachbare. Wiedr wird bahtscht
Des gangt no bis ins Ärdgschoß nundr. Hauptsach isch, daß mr sich halt trifft und wiedr mol mitnandr schwätzt.
Dr Schwob isch neigierig.
Fürn Schwob ischs ganz arg schlimm, wenn dr Nachbr meh wois wie mr sälbr. Deswäge duat mr sich oimol in dr Woch mitm Oimr, Bäsa und Kehrwisch bewaffna und gangt naus auf d Gehwäg zum Fähga. Weil jetzt abr au älle anrde grad ihr Schtroßakehrwoch machat, ko mr die Glägaheit glei nutza um s neieschte zu Erfahra.
Wem sei Onkl isch gschtorba, wellem sei Kindr wellet nur s Gäld vom Opa und sälbr hat mr ja au a weng was z jammrn. No ko mr glei no a weng übr d Politikr goscha und übrhaupt war s früher viel scheenr und bessr.
Dr Schwob muß bruddln.
Wenn dr Schwob nix zum bruddln hat, no ischs oifach nix. Und weil mr an d Politikr nix ändra ko, bruddlt mr halt übr den viela Dräck uffm Wäg und denne Dappr uff dr Träpp. Wenn dr Nachbr mol net so schee putzt hat isch dr Schwob oifach seelig: "Du Nachbr, do hasch abr was vrgässa. Den Dräck siehsch scho vom Bodasee."
No wird no a weng übr d Kemie gschimft, weil dr Meischtr Proppr isch doch beschtimmt net gut fürd Gsundheit und des bücka gangt voll ins Kreiz nei.
A tüpischs Gschpräch bei dr Kehrwoch:
(Dr Pfleiderer isch 48, Häusle bald abzahlt und schafft als Meischtr. Dr Lederer isch 55, Lährer und wohnt im Block bei Pfleiderers gegaübr.)
Dr Lederer kehrt sein Gehwäg scho a Weile, dr Pfleiderer fangt grad oh.
Pfleiderer: So, au do.
Lederer: Scho.
P: Fangsch grad ou?
L: Noi, i bin scho fertig.
P: Mr sieht gar nix.
L: Seggl.
P: Musch halt gscheit kehra.
L: Mache scho, abr d Bäsa sin heit au nimme des wasse mol wara.
P: Koi Wundr bei unsra schlechta Ausbildung.
L: Des kommt, weil d Politikr z wenig in Ausbildung neischtecka.
P: Wenn i was z saga hät.
L: Was no?
P: No dät i... Jetz guck dr den Rotzleffl oh! Latscht där durch mein Dräckhaufa.
P(blägt nübr): He du Grasdaggl! Wenne de vrwisch gibts heiße Ohra!
L: Den kenna mr doch.
P: Des war m Kümmerer sein Olaf. Sei Onkl isch neilich gschtorba.
L: Awa. Was hattrn ghett?
P: Kräbs. Odr Aschbest kennts au gwäsa sei.
L: Soso. Des isch abr koi Entschuldingung sei schlächte Nota.
P: Wo hat dr Olaf schlächte Nota?
L: Mim deitsch hattrs net so ganz.
P: Isch au net so wichtig. Schwätza muß mr kenna.
L: So jetzt binne abr fertig.
P: I au. Komm, ganga mr in d Ocksa nübr.
L: I lad de uffn Trollingr ei.
P(blägt zur Fraa uffm Balkon): Hilde, i komm in nr Schtund wiedr.
L(flüschtrt): Odr in zwoi bis vier.
gemeinsam zwiften |
youtube |
forum heute
Rechner
